Rentmeestershuus
- Ok dit joar is ut binnen alle geledingen weer een kommen en goan,
- Zo zal Maarten Rexwinkel noa acht joar veurzitterschap van de Kinderachtige commissie zien hamer an Maarten de Laak afstoan.
- Maarten Rexwinkel Drempt hef in disse acht joar alle puntjes van Schutters, Ruiters en Kinderachtige Commissie an mekaar gebreid,
- Hi-j zal de geschiedenis dan ok in goan as de bruggenbouwer die binnen het kermisbestuur zörgde veur een ongekende saamheurigheid.
- Bi-j de oaversten van de Ruiters zal noa disse kermis ok een vacature lös kommen te stoan,
- Koelkast-bewaker Gerrit Lans zal namelijk vandaag veur ut laatst op zien hobbelpeerd langs alle notabelen goan.
- Bi-j de Schutters is er dit joar een wissel van de wacht gewes en hebt wi-j te maken met een historisch feit,
- Henk Greaven zal as old-Bieleman de kommende joaren de functie van oaverste uut goan voeren en toe goan zien op strak beleid.
- Bi-j de Bielemans zult alle teksten veur geleazen goan worden door onze nieuwe Bieleman Koen,
- En deurum zult wi-j dit joar een stukje langer oaver de rondgang deur ut dorp goan doen.
- Tot slot wilt wi-j alle Schutters verzoeken um ow waardig te gedragen binnen disse gemeenschap,
- Anders wurt ut straks bi-j Steef weer één grote polonaise onder de tap!
De Spar
- De Frits van Eerd van Hummels grootste warenhuus volgt momenteel een deeltied studie tut bedrijfseconoom,
- Met de oplopende inflatie mot d’r op kosten worden bespoard en al helemoal op ut kostenpostje stroom.
- Hi-j is now dan ok van plan um de gehele parkeerplaats inclusief het terras van Fransje Dennegeur vol met zonnepanelen te laaien,
- Moar ut zal ons as Bielemans niks verbazen as hier straks een paar windmolens in de rondte stoan te zwaaien!
- Tijdens de module ‘Effectief inzetten van licht’ hef Emiel echter veuls te veul lopen flauwekullen,
- Hi-j denkt namelijk dat ut wat opleavert as de medewerkers alhier in ut donker de vakken stoan te vullen.
- Oaver de financiële geldstromen van Emiel begint wi-j as Bielemans al wel lichtelijk te grommen,
- Want mocht ut olde koffiezetapparaat de geest geven dan weigert disse ondernemmer um een ni-je te loaten kommen.
- Ondanks zien valse zuunigheid lukt ut disse kruidenier wel um zien medewerkers lang deur dit sparrenbos te loaten dwalen,
- Want Simone Janssen – i-j wet wel, den van Dennegeur – wist twee wekken geleden heur 25-joarig jubileum te halen.
- Wi-j hopt veur disse jubilaris dat Emiel veur dit heuglijke feit financieel gezien now wel ‘ns de goeie snaar hef wetten te raken,
- Want ut kan toch niet zo wean dat alle Schutters de zak veur die arme meid leug motten maken!
Domina Wijnands
- Onze Domina mocht veurige moand 10 kaarsjes uutbloazen vanweage heur jublieum as Hummels predikante,
- Moar dat disse Hummelse vertolkster van ut geleuf in Keppel woont, da’s wel een interessante.
- De Bielemans hebt vernommen dat disse jongedame as echte import Keppelaar tijdens ut volksfeest aldoar aardig hef lopen brallen,
- En dat zi-j doar onder de vogel ut woord van God in de rondte stond te lallen.
- Op de Keppelse kermis had zi-j dan ok meer toeheurders dan hier in de Hummelse kerk,
- Um dit godshuus weer gevuld te kriegen ligt d’r veur disse preakster dus nog wel wat werk.
- De vergriezing in de kerk is ingezet en de balans tussen jong en old ligt hier aardig scheef,
- Um de toko weer gevuld te kriegen lik ut ons een goed plan dat Elise elke zondag ok moar ‘ns kump zoepen en preaken bi-j ‘FF noar Steef’.
Heinekendaal
- Onze bronnen alhier waren niet vergetten um ons te melden dat wi-j dit joar niet weer hoefden te preaken dat hier regelmatig in bedde wurt geplast,
- Moar met de rest van de informatie oaver disse toko waren zi-j zo summier dat ut hoast lik dat de medewerkers zelf met dementie bunt belast.
- Van heuren zeggen waait hier echter nog niet zo lang een ni-je wind en mot Hummels oldste garde van de ene noar de andere therapie,
- A-j ow gebit kwiet bunt stuurt het interim management ow meteen noar logopedie!
- Op kosten wurt d’r hier dus zeker niet bezuunigd en al helemoal niet op verschillende managementlagen,
- D’r lup hier bi-j dit Verbanninksoord noast een ni-je bestuurder ok nog ‘ns een interim manager tussen Hummels oldste blagen.
- Angezien Anja en Merel ut geld hier loat rollen as water hopt de Bielemans dat ze dit joar ut geld loat rollen as bier,
- want ‘gruwlijke dös” is één van de sterkste eigenschappen van al die Schutters hier!
Wetholder Blaauw
- Wetholder Blaauw, welkom in het mooiste dorp van heel Nederland,
- In disse – veur de gemeente Bronckhorst onzichtbare – kern vuulen wi-j ow vandaag moar weer ‘ns an de tand.
- Noa de tekst van veurig joar was onze boodschap hier wel duudelijk dachten wi-j zo,
- De Hummelse starters wilt hier goan bouwen en i-j gaf doarop een 100% ‘GO’.
- Echter bunt wi-j now weer een joar wieter en zit d’r nog steeds geen spatje beton in de grond,
- De beloftes van de gemeente Bronckhorst worden hier inmiddels vertrouwd deur geen ene hond.
- Dat de gemeente now ok de weagen rondom Hummel durft af te sluuten steet ons hier ok totaal niet an,
- Goed oaverleg en opkommen veur de burgers doar bunt ze doar in die ivoren Hengelse toren niet zo van.
- De Hummelse bevolking geeft jullie as bestuurders dan ok nog één allerlaatste kans,
- Luuster gewoon ‘ns een keer noar het volk en luuster veural ok noar de Bielemans.
- Woar momenteel alleen de grotere kernen Hengel, Zelhem en Vorden deur de gemeente op hun wenken worden bediend,
- Is het now tied dat d’r ok an Hummel de andacht wurt gegeven die dit mooie dorp verdient.
- Nem ons advies ter harte en dan wurt hier in Hummel volgend joar gewoon weer ut vaandel veur de gemeente Bronckhorst geslagen,
- Zo niet, dan zult wi-j ut gehele college van B&W met pek en veren ons mooie dorp uut dragen!
De Veldhof
- In Hummels oldste en enige achterstandswiek bunt al joarenlang dezelfde vri-jwilligers in touw veur disse traditionele rondgang,
- Met aan het roer, de koning van het plein, Piet Pasman, al vieftien joar lang.
- Piet hef beslotten um hier noa een indrukwekkende carrière as Hoofd Horeca met pensioen te goan,
- Moar denk moar niet dat wi-j hier veur ut laatst met schutters, ruiters en muziek ut vaandel komt sloan.
- Op disse zwoare oapenstoande vacature wier gelukkig direct gereageerd,
- Hennie Weerheim van nummer 17 is degene die vanaf volgend joar veur ons de koffie en ut brood serveert.
- Hennie wi-j wensen ow de kommende vieftien joar veul succes,
- Moar ff een tip, de Bielemans zoept dat spul alleen moar kold uut zo’n gruune fles.
- Beste Piet, namens iedereen wilt wi-j ow oprecht veur de inzet van dit imposante tiedperk bedanken,
- Namens de gehele Hummelse bevolking een driewerf ‘hoera’ veur ut verzorgen van de warme – en ok – de lauwe dranken!
- HOERA, HOERA, HOERA!
FF noar Steef
- Noadat Steef rustig op gang kwam noa zien eerdere sabbatical is hi-j now weer volledig terug van weg gewes,
- Oaver de organisatie van Hummels Volksfeest zit onze kastelein namelijk al moanden in de stress.
- Verder liep disse cafébaas te zenuwen met de vroag of de Bielemans op dinsdagoavond een feestje kwamen bouwen,
- moar wel met de vermaning dat as de Bielemans de band gingen onderbrekken dat hi-j de rekkening onder ons beumke zol douwen.
- Ok lik ut d’r op dat hi-j niet echt alles deur hef wat d’r allemoal op disse aardkloot gebeurd,
- De LTO is namelijk de tennisvereniging in Keppel zo had disse wieze man ergens geheurd.
- Ondanks alle problematiek in de wereld presteert hi-j ut wèl um regelmatig in ut cafe een uiltje te knappen,
- Moar zelfs sloapend lukt ut Stevert-Jan niet um an alle onrust in zien boavenkamer te ontsnappen.
- Wi-j as Bielemans wet echter uut ervaring: Is Steef relaxed en zen, dan isse helemoal in zien hum,
- Ut lik ons dan ok verstandig dat hi-j zien café uutbreidt met Hummels eerste meditatiecentrum!
De Gouden Karper
- Net as de Hummelse Kermis waren ze ok hier bi-j de Golden Krent erg met tradities begoan,
- Alleen hef Queens Elisabeth dit joar beslotten um met de kermis de grote zaal leug te loaten stoan.
- Doarmet hef zi-j eigenhandig een andere richting gekoazen en ut Hummelse volksfeest-beleid angepast,
- Volgens wel ingelichte kringen is disse uutbaatster as enorme liefhebster namelijk graag op feestjes bi-j anderen te gast.
- Ut schient ok zo te wean dat zi-j tegenwoordig geen traditionele brulften moar progressievere feestjes veur steet,
- Onlangs was d’r hier zelfs een reggae-feestje en hing d’r een enorme wolk van wiet boaven disse keet.
- Wi-j denkt deurum dat ut een kwestie van tied is dat onze herenboer Robert zien baan van agrariër noar die van kelner geet verschoeven,
- Dan kunnen hi-j en de Queen namelijk in plaats van stikstof de hele dag samen van die gratis cannabislucht goan snoeven.
- De Schutters wilt ok wel hun geest verruumen moar dat doet ze gewoon nog steeds deur ut zoepen van bier,
- De Bielemans hopt dan ok dat d’r niet met alle Hummelse tradities wurt gebrokken bi-j disse coffeeshop
Bielemans@2022