Afdrukken

 

Uutrusten doe-j donderdags moar!

In noavolging van veurgoande joaren bunt de Bielemans (ondanks hun discutabele gedrag) wederumme deur hoofdredacteur Harold Pelgrom van de Kinderachtige Commissie verzocht een bi-jdrage te leveren an disse onverbetterlijke bestseller; ut Kermisbuuksken! Noa lang beroad hebt wi-j d’r dan toch moar weer met ingestemd, want met de 10 discipelen van diezelfde Commissie hebt wi-j eigenlijk nog een (financieel) appeltje te schillen. Moar dat terzijde...

Goed! Dat de Hummelse Kermis bol steet van tradities hoeft wi-j niemand in Hummel meer uut te leggen, moar bliekboar wel doar op dat corrupte burootje in Hengel. Al joaren hebt ze doar de bek los oaver ut ‘kleinekernenbeleid’, moar tut op heden hebt wi-j doar nog niks van gezien! Zelfs een kleine bi-jdrage an ut Feest der Feesten kan d’r niet meer af. Moar ut meeste luxueuze gemeentehuus van de Achterhoek bouwen veur een miljoentje of twintig... Is de grootheidswaanzin van de Roemeense dictator Ceausescu soms bi-j de Bronckhorster bestuurders in de kop geslagen? As klap op de vuurpijl schitterde onze burgervader Aalderink in 2007 deur afwezigheid tijdens ut vaandelsloan, nota bene veur ‘m zelf. In 3000 joar Hummelse Kermis vieren is ut nog nooit veurgekommen dat de burgemeister niet anwezig was, moar Aalderink hef de primeur in handen. ‘Chapeau!’, zol veurzitter Bos van de Kinderachtige Commissie zeggen. Veur ut vogelschieten stuurde hi-j nog wel zien vazal Ab Boers noar de Greffelinkallee, moar den vertrok met de stat tussen de benen weer richting Hengel, noa een donderspeech van de Bielemans èn de Graaf! In Hengel wet ze d’r now in ieder geval van...

As wi-j verder terugkiekt op de Hummelse Kermis van 2007 dan kunt wi-j helaas niet anders constateren dat ut een editie was met een lach en een troan. Vlak veur de kermis ontvielen ons old-oaverste Bernard Rexwinkel en Hennie Levers van De Spal. Dit hef duudelijk zien invloed gehad op de heftigheid van ut Kermis vieren. Een hele schroale troost weliswoar, moar de betrokkenheid van iedereen bi-j disse sterfgevallen en de impact doarvan op de gemeenschap was wel mooi um te zien. Minder fraai was de demonstratie van de ni-je Olympische discipline ‘Plantenbak Werpen’ wat enkele raddraaiers op de woensdagoavond an de Hummelse bevolking ten toon spreidden. Wi-j wet ok wel dat de Bielemans zelf ok niet altied de braafste broeders bunt en dat met ut vaandelsloan ut conifeertje al deur ons uut de bewuste plantenbak was geplukt, moar dat is nog steeds gin argument um dan moar de hele bak in duuzend stukken op stroat uuteen te loaten spatten. Wi-j hebt d’r een gruwelijke hekkel an um veur meester Boland / Boschman* te motten spöllen en met ut vingertje te wiezen, moar ut enige oordeel wat wi-j wilt vellen is: ‘Hol ut gezellig veur iedereen!’.

Ok was ut in 2007 de laatste keer dat wi-j veur dokter Hans Ni-jenhuuzen ut vaandel hebt geslagen, now den ‘Arts zonder Grenzen’ zien stethoscoop in de sprekwoordelijke wilgen hef gehangen. Minpuntje hiervan is wel dat d’r op woensdagmargen veur de Bielemans geen gratis consult van disse kwakzalver meer in zit en dat wi-j d’r dit joar op woensdag nog een zwoare dobber an zult kriegen um de dag vol te maken. Veur Hans zelf bunt de veurdelen legio. Ten eerste hoeft hi-j now eindelijk niet meer die joarlijkse megaflauwe grapjes van de Bielemans oaver zien camper an te heuren. Ok hoeft hi-j zien vrouw Ineke niet ieder joar weer van een ni-je hoed of pet te veurzien, now die op dinsdagoavond gewoon op de kapstok blif liggen. En misschien veur Hans nog wel ut allerbeste; bi-j ut volgende camper-uutstapje met de Bielemans kan onze wonderdokter zich now helemoal vol loaten lopen, now hi-j toch niet meer hoeft te vrezen veur tekstuele represailles... Hans, ok namens de veurgoande Bielemans ontzettend bedankt veur de mooie joaren!

Zo langzamerhand begint de Hummelse Kermis 2008 bi-j ons al wel weer te kriebelen. Maneger Ni-jman kan hoast niet wachten op zien zoveulste lasoog, JAPH hef de kwasten alweer uut de terpentine gehaald en Henkie G... Tja, Henkie G. mot dit joar de Hummelse Kermis misschien an zich veurbi-j loaten goan, mocht hi-j ‘In naam der Koningin’ worden uutgezonden noar de Gaza-strook. Mocht i-j now plotsklaps interesse hebben in een eventuele interim-functie van Bieleman, stuur dan een mailtje noar Dit e-mailadres wordt beveiligd tegen spambots. JavaScript dient ingeschakeld te zijn om het te bekijken.. Moar met of zonder Henkie G. zult wi-j d’r in ieder geval weer olderwets op knappen en d’r met zien allen een alderjekers mooie Hummelse Kermis van maken. Dit joar zit de zaal bi-j ut Hart van Hummelo dicht op woensdagoavond (ut café niet!), moar kunt wi-j disse Kermis wel in de zaal bi-j de Krint oaver de dansvloer hen zwieren. Tot slot nog effen een mededeling van huusholdelijke aard veur alle slampampers die op woensdagoavond menen de piep al leug te hebben: Uutrusten doe-j donderdags moar. Hoe smik ow den!

Namens de Bielemans,
Erik ‘JAPH’ Dreteler

 

 

*= deurhalen wat niet van toepassing is

Categorie: Programmaboekje - Van de Bielemans
Hits: 3958