Afdrukken

 

Een bettere kermis begint bi-j owzelf!

Ok dit joar is ons, de Bielemans, deur de Kindercommissie weer verzocht enige proza te schrieven veur ut kermisbuuksken. Wat een domme vroag, geen galanter en behulpzamer volk dan de Bielemans! Die knakkers van de Kindercommissie die de hele kermiswoensdag zo trots as een loopse reu met zeuven lullen met dat gruune rozetje op ut colbert loopt te pronken, snapt die dan helemoal niks? Ze vroagt ons toch ok niet of i-j bi-j de Krint bier kunt kriegen?

Awel. Dat de Bielemans supergalant bunt, blik wel uut ut feit dat menig Hummelse schone woensdagsmargens wurt opgekalefaterd deur de Bielemans. Want as de meeste dames noa een wilde dinsdagoavond met wallen zo groot as de Chinese Muur nietsvermoedend oaver stroat loopt, dan is de redding nabi-j! De plekjes op de grauwe gezichtjes die deur de dames vergetten bunt te bedekken met mascara, rouge en ander camouflagegrei, wordt deur de immer behulpzame Bielemans vakkundig bi-jgewerkt. Noa zo’n metamorfose krig zo’n deerne dan ok te heuren: “I-j ziet d’r goed uut zeg vandaag!” en de “Oh’s” en “Ah’s” bunt niet an te sleppen. Woar dit ritueel vandan kump is ons een groot raadsel, moar de drie Musketiers bunt de beroerdste niet en met name Henkie G. en Maneger Ni-jman stoat veuran um de dames bi-j te stoan met vakkundige en behulpzame adviezen.

“Mankeert d’r dan helemoal niks an de Bielemans?”, wier ons onlangs gevroagd. “Bunt jullie dan echt van die veurbeeldige koorknaapjes?”. Noa heel lang noadenken schoat ons dan toch nog wat te binnen. Heel af en toe, moar dan ok heel af en toe, gooit wi-j met de kermis wel ‘ns een plastic bekertje op stroat. Moar dat steet in geen enkele verholding töt de rest van Hummel die met de kermis massaal alle oaverbodige rotzooi bi-j ut Hart en bi-j de Krint buuten op de keien dondert, terwijl doar toch afvalbakken zo groot as olietankers in de parkeerhavens ligt. Elk joar weer ligt d’r een nog hoger gepepperde milieurekkening van de niks te malse gemeente Bronckhorst op de mat. En dan vindt sommigen ut ok nog gek dat die deurgeslagen malafide deurwaarders van de Kindercommissie ut joar d’r op weer op de stoep stoat en dan nog meer geld van ow probeert af te troggelen...

Trouwens, oaver malafide gesprokken. Dat peerdevolk in die rooie jasjes dat zichzelf ruiters nuumt, nee, dat bunt duudelijken! A-j met wilt doen an ut ringsteaken dan mo-j wel betalen, moar i-j kunt niet met doen um de èchte hoofdpries. De titel van koning(in) is veur iedereen weggelegd, moar de “Aanvoerderspries” kunt alleen de ruiters zelf winnen. Hoezo sociale ‘Rooie Rakkers’? Ze kunt wel menen dat ze hoog op een peerd zit, moar dat is toch geen vri-jbrief um uut de heugte te doen? Ut wurt tied dat die hautaine Ruiters ‘ns een keer in de leer goat bi-j die altied galante, charmante, uuterst veurkommende, behulpzame en o zo supersociale Bielemans.

Moar gelukkig hebt de Ruiters in Hummel niet alles veur ut zeggen. An ut vieren van de kermis mag, nee mot namelijk wèl iedereen met doen. En de laatste joaren geet ut weer de goede kant op; bi-jnoa iedereen dut met en ok weer op de woensdagoavond. Dit joar zal op woensdagoavond de zaal van de Krint dicht
zitten en kuw met zien allen bi-j ut Hart terecht um de bloemetjes buuten te goan zetten.

Weas ook ‘ns een keer galant en behulpzaam en slep ow ingedutte wederhelft/kameroad/buurman/buurvrouw etc. op woensdagoavond uut de hangmat. Ow faam zal ow nog eeuwen veuruutsnellen; poorten die normaal gesprokken dicht blieft, zult veur ow los vliegen as vers geöliëde klapdeurtjes. Kiek moar noar de Bielemans!

Denk d’r an: Een bettere kermis begint bi-j owzelf!

Rest ons slechts de gebruukelijke tekst:

Namens de Bielemans,
Erik ‘JAPH’ Dreteler

 

Categorie: Programmaboekje - Van de Bielemans
Hits: 3272