Afdrukken

 

Rentmeestershuus:

Jullie zult ut ongetwiefeld in de wandelgangen al hebben vernommen
Ut afscheid van oaverste Bennie Janssen steet d’r an te kommen
Volgend joar zal Mark Jansen van ut Veugeltjen as oaverste tegen de Schutters an lopen lullen
En zal Bennie in zien eentje achter de viskroam goan zitten brullen
Moar veurdat Bennie wurt oavermand deur heavige emoties en as een klein kind de hele dag geet lopen janken
Wilt wi-j ‘m hier dan ok al veur al zien joaren trouwe dienst goan bedanken
En Schutters, goa Bennie zien laatste dag as oaverste now niet lopen vergallen
Maak d’r met zien allen een alderjekerse mooie dag van: Wi-j goat weer knallen!

    Bennie bedankt, Bennie bedankt!

Dominee:

Noa een aantal joaren hier niet meer op dit smoezelige gazonnetje te hebben gestoan
Kunt wi-j dit joar veur de ni-je dominee Reinier Kleijer ut vaandel goan sloan
Disse preaker is nog moar net hier en hef now al spiet dat hi-j niet 10 joar eerder in Hummel is kommen hokken
Want noar ut schijnt is Reinier alleen moar veur de ankommende drie joar as dominee angetrokken
Oaver drie joar wurt hi-j namelijk al vief-en-zestig en doarnoa zal hi-j niet meer vanaf de kansel deur de kerk lopen reren
Hi-j hef dus ok moar een paar joar de tied um zich op de Hummelse Kermis as een volwaardige preaker te profileren
Desondanks hef hi-j zich dit joar van alles en nog wat deur boze tongen in loaten fluusteren
Moar preakertjen, vanaf now mot i-j alleen nog moar noar de Bielemans luusteren
Dus schei moar gauw weer uut um met die mierzuute bonbons, dreuge koek of kleffe cake te goan lopen leuren
Anders zult wi-j toch motten oaverweagen um hier volgend joar vol gas veurbi-j te scheuren
Want Reinier wi-j wilt hier gewoon in een goddelijke oceaan van bier zwemmen
As een woar Christen zul i-j toch ok begriepen dat alleen het allerheiligste nat de Schutters tut tevredenheid kan stemmen

Spar Janssen:

Fransje Dennegeur hef met recht een klotenjoar achter de rug en geet onder een zwoare last gebukt
Want nog niet zo lang geleejen is zien vrouw Doortje uut ons midden weggerukt
Toch bunt wi-j ok dit joar gewoon weer welkom veur een bierige traktatie
Dus Schutters graag veur Frans en zien familie een oorverdovende stoande ovatie!

Burgemeester:

Allereerst wilt wi-j onze burgervader bedanken dat hi-j now wel de moeite hef genommen
Um dit joar de gehele dag in vol ornaat noar de Hummelse Kermis te kommen
Onlangs hef Aalderink met weinig succes op een cursus Portugees zitten blokken
Moar noa één dag was zien lerares ‘m al beu en was met de noorderzon vertrokken
Ut lik ons dan ok veul verstandiger dat hi-j eerst moar ‘ns cursus plat proaten geet uutpluuzen
Zeker now dit grote taalwonder op papier zelfs in Hummel is kommen huuzen
Formeel hef disse grapjas zich dan wel een huus an de Pennekampweg gehuurd
Moar ok al mot een burgemeister in zien eigen gemeente wonen zit Aalderink in de praktijk nog steeds parmantig in zien eigen Doezeburgse buurt
Volgens ons hef hi-j de achterliggende gedachte van ut betrekken van die huurwoning strikt geheim willen hollen
Net as zien veurganger Jenever Peter wil Henk de Biertank met de Hummelse Kermis natuurlijk gewoon met de hoeven vol snel deur de veurdeur kunnen rollen

Heinekendaal:

Zoas elk joar hebt ze hier op ut Heinekendaal nog steeds de gebruukelijke water oaverlast
Moar waarschijnlijk kump dat deurdat menig bewoner gewoon in bedde plast
Deur de hoge werkdruk hier mot ut verzorgend personeel zich wringen in allerlei bochten
En doardeur ligt menig bewoner van dit Verbanninksoord nog tot 10 uur ’s margens in ut kazematjen te verspochten
Ut is zelfs zo slim dat de bejaarden hier pas um 11 uur de zondagse kleren kriegt angeritst
En dat de van de honger jammerende bewoners dan ok eindelijk ’ns een keer ut ontbijt in de maag kriegt gesplitst
Wi-j hopt dan ok dat vandaag de verzorging van ut hele spul stukken sneller geet hier
Wi-j hebt namelijk geen tied um tut zoaterdag te motten wachten op ons bier

Dokter Ni-jenhuuzen en Dokter Mast:

Dokter Ni-jenhuuzen hef dit joar zien stethoscoop oavergedragen an Dokter Vlaggemast
Deurum leek ons een afscheidscadeau veur Hans dan ok wel gepast
Allereerst hebt wi-j nog één keer veur den olde kwakzalver ut vaandel loaten sloan
Moar veurdat hi-j echt van ons af is zal hi-j eerst met ons nog een keer met zien rammelende camper op pad motten goan
Dokter Vlaggemast doarentegen mot zich bi-j de Bielemans nog helemoal goan bewiezen
En disse ni-je kwakzalver krig ut dit joar dan ok al geliek goed veur de kiezen
Um Jeroen veur ens en altied de Hummelse tradities goed in de oren te floepen
Neudigt wi-j ‘m uut um dadelijk bi-j ut Hart van Hummelo onder de tap te kroepen

De Veldhof:

Een enorme vergriezing was op Hummels oldste ni-jbouw duudelijk herkenbaar
En ok de bewoners van ut Piet Pasman Plein (PPP) constateerden dat ok al onder mekaar
De afgelopen joaren is de vergriezing eindelijk een halt toegeroepen
En zie-j hier zelfs weer kinderen oaver stroat rollen en kroepen
Zo goan de goeie tradities van brood en koffie hier tenminste niet verloren
En komt de Schutters oaver vieftig joar nog steeds van de Veldhof terug as herboren!

    Hulde!

't Hart:

Veurig joar was hier met de kermis op woensdagoavond bi-j Theo en René de kolder compleet in de kop geslagen
Volgens disse twee homo sapiëns was de hele cafetaria kort en klein gehouwen deur een paar raddraaiende blagen
In werkelijkheid lag d’r op stroat moar liefst één plantenbak in duuzend brokken
En was de paniek bi-j disse twee uutbaters van ut Hart toch wel wat oavertrokken
Wi-j bunt ok van mening: dit veurval ging het boekje ver te buuten
Moar vindt ut een betjen oaverdreven um doarveur een snotterbel met gillende sirenes van bedde te motten loaten lichten en de tent ok nog ‘ns te sluuten
Theo en René denk toch an de bloeddruk, tel tut tien, adem in, adem uut, goa desnoods op de kop stoan
Pas as hier ut bier op is, is er echt een reden um tut paniek oaver te goan!

 

Categorie: Bielemansteksten
Hits: 3417