Afdrukken

 

D’r is mien deur Johan van d’n redactie van dit buuksken gevroagd ’n stuksken te schrieven oaver de Hummelse karmis van vrogger, in de tied dat ik nog bieleman was. Ik bun destieds gevroagd um bieleman te worden deur Peter Ooyen en Derk Besselink, de old bielemans, en Hans van de Kapper. Ik bun begonnen in 1977 met Johan Meenink en Henk ‘Lampekappie’ Kempers (hi-j kreeg disse bi-jnaam omdat hi-j bi-j café De Tol vaak met zien heufd onder de lampekap zat). Ik bun 13 joar bieleman gewes, de meeste tied met Bennie Jolink en Bennie Migchelbrink.

Ik kan mien nog goed herinneren da’w een keer druk waren met 't versieren van de auto bi-j mien thuus in de Korte Boksestroat. D’r stond ‘n geitenbok achter ’t huus an ’n poal, en ik mo’s neudig uut de bokse. De wc kon ik niet meer halen, dus ik denk: ik doe ‘t gewoon achter ‘t huus. Moar toen ik aan het pissen was liep ’t mien in de klompen. Wat was now ‘t geval? De bok stond mien tegen de bokse an te stroezen!

Wi-j gingen al in 1980 bi-j Bennie Besselink onder de tap liggen. Dat he’w met z’n drieën ok heel lang volgehollen. De eerste keer hield ik ‘t 52 seconden vol, en de letste keer (in 1988) 66 seconden. Ik heb lang ’t record op mien naam gehad, totdat André Nijman ‘t aan barrels dronk. Doar kan ok gin mens tegen op.

Wi-j zaten ok ’n keer bi-j Fredrik en Hentje Jolink thuus. Ik had zo’n onmundigen dorst da’k dacht ik mot now wat drinken. Ik pakken de fles limonade en dronk ‘m in één keer leug. Wat bleek, ‘t spul was olderbastend zuut. Toen zei Hentje dat 't niet angemaakte limonadesiroop veur de kleinkinderen was die ik opgedronken had.

Wi-j waren als bielemannen de hele dag an ‘t zoepen, sprekken en angoan, moar wi-j werden verdorie nooit zat. Dat kan toch ga niet zo'j zeggen, moar ’t is toch woar. De dag van de kermis begon trouwens al ’s margens vrog met jonge jenever bi-j ons thuus en later ging dat ok zo bi-j Bernard Rexwinkel.

De kermis is deur de joaren hen wel wat veranderd. I-j mot natuurlijk met de tied metgoan, moar de tradities mo’w toch wel in ere hollen. ’t Is en blif een oogstfeest, feest veur boeren en buutenlu'j of neet dan!

Ik heb elk joar nog metgedoan met ‘t vogelschieten. Altied ging ‘t schieten goed, behalve de leste paar joar. D’n kogelvanger het meer te li-jen gehad dan de vogel. Dit kump deurdat mien de ogen dichtfloepen. Dan kiek ik noar boaven, schiet en zie doarnoa de vogel nog gewoon hangen. Alweer mis dus.

Henk 'Hendrik Haverkamp' Wolters

 

 

Gepubliceerd in het programmaboekje van 2008

Categorie: (Bekende) Hummeloërs over de Hummelse kermis
Hits: 6010